Локалната администрација на Гостивар се вклучи во летната крводарителна акција

За да не дојде до недостиг на крв и крвни продукти, во текот на летниот период, на подрачјето на  Гостивар се спроведуваат вонредни летни крводарителски акции. Првата, успешно беше организирана во јули во просториите на службата за трансфузиологија, а денес се спроведе и втора акција.

Овојпат, гостиварскиот Црвен Крст активноста ја организираше во соработка со Општина Гостивар, а во неа се вклучија вработените во локалната администрација. Беа собрани 11 единици на крв.

Од Црвениот Крст се задоволни од интересот и одзивот за крводарување на подрачјето на Гостивар.

„Многу граѓани се приклучуваат на семејството крводарители, акциите успешно се спроведуваат и затоа Гостивар редовно има доволно резерви на крв и крвни продукти“, рече Бурхан Клинче од организацијата.