Малите ангели од Гостивар порачаа „Многу ве сакаме“!

Со пригодна свеченост на која беа доделени плакети на благодарност, здружението на лица со посебни потреби „Заедно можеме“ од Гостивар, ги заокружи активностите за 2019-та година. Во текот на годинава, здружението спроведе триесетина проекти, а од своето постоење педесетина, сите за помош и поддршка на лицата со посебни потреби, со акцент на децата.

„Во име на овие ангели кои се покрај вас, а кои имаат душа чиста како солза, ќе ја пренесам нивната порака: “Ние многу ве сакаме“… Многу ве сакаме затоа што вие бевте оние кои на бесконечниот мрак на нашите животи ни дадовте светлина, за да и ние го видиме светот како што сте го виделе вие, уште од првите мигови на вашиот живот. Оваа свеченост ја организираме за да покажеме почит кон сите луѓе со добра волја. Главните столбови што го држат овој свет се добрите луѓе и овие ангели. Се додека постојат, светов ќе опстане“, рече претседателот на здружението, Шпенди Салија.

Плакети во знак на благодарност за поддршката им беа доделени на градоначалникот Арбен Таравари, муфтијата Ефенди Фетаху, пратеничката Дафина Стојановска, потпретседателката на ДИК, Дитмире Шеху, директорот на Центарот за култура Ход Мифтари, педијатарот Ферит Муча, Надица Величкоска, директор на Центарот за социјална работа и други триесетина соработници и поддржувачи. Плакети добија и локалните медиуми, меѓу кои и Gostivarpress.mk.