Матурантите од Гостивар деновиве ќе слават – полицијата апелира да не прават бељи

Во пресрет на традиционалните матурски прослави, Секторот за внатрешни работи Тетово апелира до матурантите да се воздржат од користење на возила до угостителските објекти и назад и посебно ако немаат положен возачки испит и непоседуваат валидни дозволи.

„На матурантите им се укажува, исто така, без разлика дали поседуваат возачки дозволи или не, да не седнуваат зад волан во алкохолизирана состојба и на друг, побезбеден начин, да го организираат превезувањето кон угостителските објекти или нивните домови. Истовремено ги потсетуваме матурантите и да се воздржат од  нарушување на јавниот ред и мир, преку иницирање или учество во тепачки, пуштање  прегласна  музика или со пукање со огнено или друго оружје, гасни пиштоли“, стои во апелот.

Полицијата нагласува дека секое непочитување на апелите и препораките соодветно ќе биде санкционирано, со цел да се обезбеди нормално и безбедно одвивање на претстојните матурски прослави, без разлика дали станува збор за угостителски објекти или на отворен простор.

Полициски службеници на Секторот за внатрешни работи Тетово деновиве ќе ги посетат сите средни, а подоцна и основните училишта, како и угостителските објекти во кои ќе се организираат матурските и полуматурските забави.