Мавровски Меморијал 57 пат по ред на падините на Бистра (24-26 февруари)

На патеката Мирна долина, на падините на Бистра, годинава од 24 до 26 февруари ќе се одржи 57-то издание на традиционалниот Мавровски меморијал. Спортска манифестација која се одржува во спомен на 38-те градители на електро системот Мавровка и 14-те граничари, кои ги загубија животите во снежната лавина во 1956 година.

Годинава пријавени се преку 80 учесници од 12 држави во двете категории мажи и жени. Ќе се натпреваруваат натпреварувачи од Швајцарија, Русија, Луксембург, Србија, Босна и Херцеговина, Романија, Турција, Грција, Хрватска и Македонија.

Натпреварите се закажани за вторник и среда кога ќе се одржат трките на 5 и 10 километри во слободен стил, а на 24 феруари ќе биде свеченото отварање во Маврово.

Мавровскиот Меморијал е најстар нордиски куп на Балканот и помеѓу настарите ски купови во Европа. Меморијалот е дел од континенталниот куп во нордиско трчање и на истиот натпреварувачите се борат за освојување на FIS бодови.