Месецов дваесетина пожари на отворено во гостиварско

Топлото време носи зголемен ризик од избувнување и лесно ширење на шумски пожари и секое лето во тој поглед бара зголемена будност и внимателност. Од почетокот на месецов, во регионот на Гостивар регистрирани се дваесетина пожари на отворен простор. Биле со помал обем, навремено локализирани, без жртви и повредени и без големи материјални штети. Од гостиварската противпожарна единица оценуваат дека во однос на претходните години, не се бележи некое посебно зголемување на шумските пожари, но апелираат граѓаните совесно да се однесуваат и навремено да пријавуваат доколку забележат пожар.

„Искуството покажува дека сега престои период на зголемен ризик, тревата се суши, тука се и високите температури. Апелираме до граѓаните да не палат огнови на отворено и да не известат брзо во случај на пожар“, вели Томе Василевски, командир на Противпожарната единица во Гостивар.

Во насока на превенција на шумските пожари, Министерството за земјоделство и  Јавното претпријатие „Македонски шуми“ воведоа делумна забрана за движење во шумите со стопанска намена. Забраната започнува да важи од утре, 15 јули, па се до 15 август.