Моќен KK Гостивар, пукна првата „стотка“ сезонава

По сензационалниот триумф во Кавадарци, Гостивар ја оствари и втората победа сезонава.

Нова жртва е Кожув против кого повратникот во елитата ја оствари првата „стотка“ во домашното првенство оваа сезона (101:75). Гостивар доминираше во текот на целиот натпревар со исклучок на првите две минути во кои Кожув водеше со 5:0.

Гостивар одговори со шест поени во низа, а израмнето беше до 9:9 по што домаќините направија уште една серија, сега од 13:0 и целосно ги свртеа работите во своја корист.

Во 15. минута беше 36:15 за домашните кошаркари, но Кожув со две добри серии целосно се врати во игра во третиот период кога резултатот беше 51:51. Крајот за Кожув беше серијата од 10:0 на Гостивар пред крајот на третата и почетокот на последната четвртина. Нешто подоцна повторно беше +21 (83:62) за на две минути пред крајот домаќините да ја достигнат најголемата предност (96:66).

Поранешниот младински репрезентативец Јетмир Зеќири доби поголема минутажа и максимално ја искористи постигнувајќи 23 поени со кои беше најефикасен на натпреварот. Мишковиќ со 16 го предводеше Кожув.

Во соработка со:
Basketball.mk