На депонијата Русино ќе се поставуваат соларни панели за струја

На регионалната полошка депонија Русино, кај Гостивар наскоро ќе се постават соларни панели за производство на електрична енергија. Јавното претпријатие Русино-Полог во чија надлежност е менаџирањето со депонијата, средствата за оваа намена ги обезбеди преку донација, а со цел да ги намали трошоците.

„Од швајцарскиот Секретаријат за економски прашања добивме донација за поставување на соларни панели за производство на електрична енергија. За сега струја имаме од агрегати, а тоа е доста скап метод за произвдство на електрична енергија, бидејќи цената на горивата постигнува рекордни цени. Со панелите ќе имаме сопствена електрична енергија и ќе ги намалиме трошоците. Истата донација опфаќа и поставување канализација, тоалети и обезбедување цистерни за вода кои ќе овозможат да има и техничка вода и вода за пиење за потребите на депонијата и за вработените.“, информира директорот на претпријатието, Бесим Догани.

Како што претходно објавивме, Русино неколку месеци функционира како регионална депонија за Полог и таму дневно се фрлаат околу 200 тони ѓубре од деветте полошки општини.

Претпријатието веќе се наоѓа во финансиски ризик, поради тоа што општините и комуналните претпријатија кои одлагаат отпад, не си ги плаќаат обврските редовно и имаат долгови.