На Гостивар му требаат слаткари и фризери, отворен е оглас за обуки

Гостиварската баклава е надалеку прочуен деликатес. Кој еднаш ја вкусил, секогаш ќе се враќа за парче плус. Гостивар е град во кој слаткарската традиција се негува од дамнина. Но, последнава деценија младите се поретко кои сакаат да навлезат во тајните на слаткарскиот занает.

Со цел да се поттикнат да го изучат и да им се помогне со работен ангажман, наредниот период ќе се спроведуваат обуки за слаткари на државна сметка за невработени лица. Дефицитарна професија е и фризерството, па и таа ќе биде опфатена со оваа мерка.

На сите кои ќе ги завршат обуките ќе им биде доделен сертификат, а во периодот додека траат ќе добиваат по 9.000 денари месечно за трошоци.

„Обуките ќе се спроведуваат три месеци, со теоретски и практичен дел. Обуки за слаткари во Гостивар за прв пат се организираат и може да кажеме дека има интерес за учество. Пријавувањето се уште трае, очекуваме да има уште повеќе заинтересирани“, вели Хисен Амзаи, раководител на Центарот за вработување во Гостивар.

Пријавувањето за учество во обуките за слаткари и фризери трае до петок, 31 јули. За слаткари се пријавиле над 20 невработени, додека за до сега фризери 17.

Во меѓувреме за Гостивар тече и огласот за лични асистенти на лица со посебни потреби.