На Градскиот стадион во Гостивар: Вардар Форино – Вардар Скопје (8:9)

Денеска се одигра првиот натпревар од шестнаестфиналната рунда во фудбалскиот Куп на Македонија. Ждрепката сакаше на Градскиот стадион во Гостивар да се сретнат екипите на Вардар од Форино и акуелниот шампион Вардар од Скопје. Поради Covid-19 мерките, љубителите на фудбалот од регионот ја пропуштија можноста од трибините да ја следат оваа пресметка на клубовите кои носат исто име и имаат исти бои.

„Црвено-црните“ од двата табора одиграа натпревар за паметење. Поведоа гостите во 38. минута, од белата точка сигурен беше капитенот Блажевски, за после 12 минути игра во вториот дел, Петковски зголеми на 0:2 во 57. минута. Кога се мислеше дека победникот е веќе познат, форинци со двата гола на Алији од пенал во 72. и 74. минута го вратија натпреварот од почеток. До истекот на 90. минута немаше повеќе голови, натпреварот заврши 2:2, се премина на пенал завршница.

Тукму пенал рулетот донесе вистинска драма, потребни беа 9 серии за да се добие победникот. Први шутираа гостите од Скопје, за по два промашени пенали, Вардар од Форино при резултат 3:3 во петтата серија имаа меч топка, не ја искористија шансата, по што следуваше уште еден промашен пенал во деветтата серија после кој актуелниот шампион Вардар од Скопје со конечен резултат (8:9), се најде во осминафиналето.