На Националниот портал за е-услуги за граѓаните достапни 127 услуги од разни институции

Ставен е во функција Националниот портал за е-услуги каде со oнлајн аплицирање достапни се административни услуги за граѓаните. На порталот се достапни 127 електронски услуги, од кои 57 за прв пат се нудат електронски, додека 70 се веќе постоечки. Надлежните најавија дека овој број секојдневно ќе се зголемува.

„Целта на овој систем е да ги поврзе системите на институциите за давање јавни услуги и истите да ги обезбеди за граѓаните, преку едно централно место. Ова е уште еден чекор кон остварување на една од најважните реформски зафати, а тоа е реформата во јавната администрација, за создавање стручна и ефикасна, отчетна и транспарентна администрација, која ќе обезбеди квалитетни услуги за граѓаните и бизнис-секторот и ќе ги заштити нивните права. Граѓаните и бизнис заедницата во центар, а административните службеници и институциите како нивен сервис“, рече премиерот Зоран Заев на промоцијата на порталот.

Министерот за информатичко општество и администрација Дамјан Манчевски, ги претстави и начините за регистрација на порталот, според кој за се пристапи до сите можности што ги нуди, претходно е потребно граѓаните да креираат eID профил, а сите оние кои имаат активна корисничка сметка во УЈП, веќе имаат активен eID профил, односно можат да се најават на профилот, користејќи ги корисничкото име и лозинката од УЈП. За нив услугите од порталот се веќе достапни.

„Порталот се состои од јавен и приватен дел. Тоа што е важно за граѓаните е дека јавниот дел е достапен за сите, без потреба од било каква најава или идентификација. Тука можат да се најдат податоци за услугите кои ги обезбедуваат надлежните органи. Приватниот дел е достапен само за регистрирани и идентификувани корисници на Системот за единствена најава. По најавата, граѓаните ќе имаа можност да поднесуваат барања во електронска форма за добивање на е-услуга, да плаќаат за надоместокот и административната такса за е-услуги, да добиваат одговор на барањето и најважно да добиваат електронски услуги“, информираше Манчевски.

Порталот е достапен и на албански и на англиски јазик.