На општинската зграда, училиштата, градинките во Гостивар ќе се поставуваат соларни панели, почна процедура за концесионерство

По еден час дебата, повлечи-потегни и негодувања, на денешната седница на Советот на Општина Гостивар беше усвоена одлука за јавно-приватно партнерство за поставување на соларни панели на општинската зграда, училиштата, градинките, спортската сала и други јавни општински објекти. Со ова практично отпочна процедурата, а треба да следува објава на оглас за заинтересирана приватна фирма партнер.

Дискусијата главно се однесуваше на условите кои ги опфаќа изработената физибилити студија за концесионерството. Од советничката група на ДУИ излегоа со став да не се брза со донесување ваква одлука, дека треба добро да се разгледаат условите и да се увиди кој е бенефитот за општината.

„На претходната седница претставник на фирмата што ја изработи физибилити студијата зборуваше 45 секунди за студија од 450 страници. Тоа е потценување на интелигенцијата на советниците и на граѓаните. Треба да дадеме 44 илјади квадратни метри од јавните објекти под концесија. Нормално дека инвеститорот бара да има корист од тоа, но би предложил, освен предвидените 10% добивка, да се предвиди и покривање на трошокот за објектот. Да не брзаме со гласање“, кажа советникот Азиз Даути.

Башким Асани од канцеларијата за локален економски развој рече дека во тендерската документација општината може да бара секакви услови, но треба да бидат реални за да се јави и интерес кај компаниите.

„Одлуката за јавно-приватно партнерство е само почетната фаза, администрацијата потоа ќе ја изработува тендерската документација. При тоа, мора да бидеме претпазливи какви услови ќе наведеме, затоа што може да нема никаков интерес. По реакциите на советници на претходната седница веќе направивме корекции околу процентот на провизија и времетраењето на концесијата. Така и другите сугестии ќе ги разгледаме и опфатиме во тендерската документација. Легитимно е да бараме, но треба да бидеме внимателни, дали потоа огласот ќе биде успешен.“, кажа тој.

Забелешките на другите советници говорници, исто така беа во насока на одложување на оваа точка, за да се даде простор за подетални анализи. Од општината пак, повторија дека е важно одлуката да помине, а понатаму може да се вршат корекции.

Претседателот на Советот, Ваљбон Лимани на крај побара во условите да се вметне и хибридниот модел, кој содржи и покривање на трошоците за објектот. „Јавно се обврзувам дека одлуката ќе ја потпишам, откако ќе се уверам дека тоа е сторено“, рече тој.

Одлуката за јавно-приватно партнерство за поставување на соларни панели на вкупно 29 објекти помина со 18 гласа ЗА. Според предвиденото работите треба да стартуваат на први јануари наредната година.