На Светскиот ден на театарот Гостиварски театар започна подготовка на нова претстава, комедија за бракот

Гостиварски театар симболично на Меѓународниот ден на театарот, 27 март, отпочна  подготовки на нова претстава, комедијата „Чорба од канаринец“ од авторот Милош Радовиќ. Екипата денес одржа прво читање на текстот, а премиерата според најавите публиката може да ја очекува кон средината на мај.

„Нема поубав и подобар начин да се одбележи празникот на театарот од почеток на нова претстава. Затоа и решивме првата проба, првото читање на текстот за новата претстава да биде на денешен ден, 27 март“, рече директорот на театарот, Сулејман Рушити.

Режисерот Игор Ивковиќ откри дека во комедијата како тема се обработува бракот со сите предизвици што ги носи во модерното време.

„Среќни сме што заедно со една важна актерска екипа, сме на добар пат, имаме материјал и потенцијал да направиме една одлична комедија. Претсавата зборува на тема за и околу бракот, кои теми и дилеми ги отвора во денешно време бракот, предизвиците со деца, животот на брзи кредити итн. Верувам дека на публиката ќе и биде интересно, со оглед дека и пристапот е поинаков, значи со директни обраќања кон гледачите, публиката не е само нем воајер кој ќе набљудува.“, кажа режисерот.

Оваа година Гостиварски театар од Министерството за култура доби поддршка за три претстави, од кои две на албански и една на македонски јазик и дополнително од општината делумно е поддржана уште една претстава на турски јазик.

„Чекаме одговор и за петтиот проект за кој првичните информации се позитивни, што значи очекуваме да имаме пет премиери годинава и сите ќе бидат комедии. Во оваа прилика, би сакал да потсетам на нашата кампања „Подари билет, подари насмевка“ преку која сакаме да го вклучиме бизнисот во напорите за проширување на театарската публика. Компаниите може да купуваат колективни билети и да ги подаруваат на свои клиенти и вработени, а за возврат ние ќе ги рекламираме како наши поддржувачи.“, рече Рушити.

Во комедијата „Чорба од канаринец“ улогите ги играат Ирена Илиевска и Марко Дојоски, сценографијата и костимите се на Бранкица Јорданоска, а музички соработник е Миодраг Костиќ.