Над 1.800 граѓани во Гостивар повеќе години мачат мака да дојдат до работа

Бројката на граѓани на подрачјето на Гостивар кои со години мачат мака да дојдат до работа, не е занемарувачка. Статистиката потврдува дека обезбедувањето на егзистенција преку сигурно работно место, за голем дел на населението е долг и напорен пат, полн со секакви препреки.

Според последните податоци од Агенцијата за вработување на Македонија, на листата на невработени на гостиварското подрачје запишани се 332 лица, кои чекаат работа осум или повеќе од осум години. Над 1.500 граѓани бараат работа, од четири до пет години.

Актуелната вкупна бројка на невработени лица во Гостивар е 5.524, од кои 1.988 се припаднички на женскиот пол. Според степенот на образование, најбројни се оние без или со завршено основно училиште, кои ги има 2.980. Среднисти без работа има над 1.500, а на листата на невработени се и 60-тина магистри и еден доктор на наука.

Што се однесува до возраста, има невработени граѓани од сите возрасни групи. Скоро 700 се на возраст од 25 до 29 години, додека над 1.100од 30 до 39 години. Со над 60 години, има 548 лица без работа.