Зголемен е ризикот од пожари, се апелира на внимателност

Интензивирањето на грејната сезона, значително ја зголеми опасноста од избувнување пожари, поради стари и дотраени електрични инсталации, неисправни печки и неисчистени оџаци во куќи или станбени згради.

Секторот за внатрешни работи Тетово повторно апелираше до граѓаните за максимална внимателност. „Граѓаните да не ги оставаат вклучени грејните тела кога подолго време не се присутни во домовите или работните простории, особено не греалки, клима уреди или печки на дрва. Зашто, доволна е само мала искра  да пламне голем пожар со сериозни материјални и други последици.“, стои во нивниот апел.

 Предизвикувањето на општа опасност претставува кривично дело за кое е предвидена затворска казна од една до пет години, а доколку тоа е направено од небрежност казната е до три години.

„Граѓаните доследно да ги почитуваат овие апели и укажувања, за да се превенираат можните пожари и да се спречат посериозни последици по нивниот живот и имот.“, велат од СВР.