Намален бројот на социјалци во гостиварско – на листата повеќе ги нема стечајците

За над 200 е намален бројот на корисници на социјална парична помош во гостиварскиот регион. Најголемиот дел од нив се поранешни работници од Готекс, Горни Полог и други фирми кои се опфатени со законот за стечајци и почнале да добиваат  надоместок по тој основ. Одреден број корисници, пак нашле вработување.

Актуелната бројка на социјални семејства на подрајчето на Гостивар изнесува 1.920. До Центарот за социјална работа месечно се поднесуваат по триесетина нови барања, за кои се одлучува дали ќе се прифатат или не, откако ќе се разгледаат документите и извршат теренските проверки.

Во гостиварско 328 средношколци коишто доаѓаат од социјално ранливи семејства добиваат паричен надоместок како помош за школувањето. Годишно на ученциите им следуваат 12 илјади денари кои се исплаќаат на четири рати. За да можат да го земаат овој надоместок, средношколците мора редовно да посетуваат настава и да достават потврда од училиштето за редовен ученик.