Не престанува палењето на Русино, екипите ноќеска три часа гаснеле пожар

Регионалната депонија Русино во близина на Гостивар деновиве честопати гори. Непријатна миризба и чад во градот, особено се чувствуваат во вечерните часови. Пожарникарите и екипи на Комуналец, постојано се на терен, интервенираат и ги гаснат пожарите. Последен пат Русино гореше ноќеска, кога екипите гаснеле околу три часа. Според директорот на претпријатието, Исак Лазами во прашање е намерно палење на отпад и тоа обично во време на празници, како што беше сега за муслиманскиот Рамазан Бајрам.

„Денеска, моментално состојбата е стабилна. На депонија гореше синоќа и нашите екипи гаснеа на терен од полноќ до околу три часот. Која е причината, зошто некој пали отпад во кругот на депонијата, тешко е да се каже. Дали се пиромани, дали сето ова има политичка заднина, да се крене револт кај населението, затоа што најчесто се случува за време на празници, има и такви гласини. Како и да е, ние интервенираме, кога е помал пожар со сопствената механизација, кога е поголем обем и преку ангажирана фирма“, вели Лазами.

Директорот на ЈКП апелира до граѓаните доколку забележат палење на отпад, чад или слично веднаш да пријават во општината или во претпријатието, за да може навремено да се преземат мерки.

Русино е стара рана за гостиварци. Депонијата со децении наназад претставува еколошка бомба, без никакви стандарди и правила за одложување на ѓубрето. За да се надминат овие проблеми, почна реализација на проект од странски донатори, во кој се вклучени сите полошки општини. Менаџирањето со депонијата Русино треба да го преземе регионално претпријатие кое веќе е формирано, но се уште не профункционирало.