Неколку од повредените и натаму во животозагрозувачка состојба – се врши операција врз пациентка од неврохирургија

Според последните информации од Министерството за здравство, во моментов на скопските клиники се изведува операција на пациентка од неврохирургија, повредена во сообраќајната несреќа од 13 февруари. Неколку од повредените се уште се критични.

„Во Градската општа болница „8-ми Септември“ хоспитализирани се 18 пациенти. Тројца од нив се наоѓаат во критична состојба, додека пак останатите 15 пациенти се во стабилна здравствена состојба и закрепнуваат од повредите во тешката сообраќајна несреќа која се случи во близина на селото Ласкарци, на автопатот Скопје-Тетово. Еден пациент во текот на вчерашниот ден е пуштен на домашно лекување. Во Клиничкиот центар во Скопје хоспитализирани се 6 пациенти, од кои 3 на Клиниката за анестезија, реанимација и интензивно лекување – КАРИЛ. Двајца од нив се во стабилна состојба. Пациентот кој е хоспитализиран на Клиниката за торакална хирургија и пациентката (трудница), која се наоѓа на Клиниката за гинекологија и акушерство, се исто така во стабилна здравствена состојба. Во моментов се изведува операција на пациентка од неврохирургија. Пациентката која се наоѓа во тетовската болница е во стабилна и добра здравствена состојба.“, наведуваат од Министерството.