Обична фолија за необична намена

Секоја домаќинка ја има дома, а не знае за што се таа може да и послужи. Алуминиумската фолија не е само „чувар“ на топлината или свежината на јадењета, таа има далеку поширока примена.

Дали знаевте дека со нејзина помош можете совршено да исчистите сребро? Ставете парче фолија во тава, додадете малку вода и ставете две лажици сол, па ставете го накитот кој сакате да го исчистите. Оставете го да отстои три до четири минути, а потоа предметите исперете ги и избриште ги со сува крпа.

Ако останете без жица за рибање на загорените остатоци од дното на садовите, само изгужвајте парче фолија и тоа ќе ви послужи како вистинско „оружје“.

Доколку ножичките ви отапеле, не морате да купувате нови. Превиткајте парче фолија  на неколку делови и исечете го со ножиците неколку пати. Ќе видите дека се остри, исто како нови.

Тврдиот кафен шеќер, можете повторно да го вратите во „песочна“ состојба, така што ќе го завикате во фолија, ќе го ставите во рерна и ќе го печете пет минути, на 150 степени.

За вашите стари радијатори подобро да греат, залепете парче дебела алуминумска фолија на картон, кое ќе го ставите помеѓу ѕидот и радијаторот. Водете сметка страната од каде што е фолијата да биде свртена кон радијаторот.