Од 20 до 50 евра казни за пешаци во Гостивар кои претрчувале улица

Вчера (20 мај) од 10 до 15 часот, на тетовскотo и гостиварското подрачје била спроведена акциска контрола врска на прекршоците кои ги прават пешаците во сообраќајот. СВР информира дека вкупно биле откриени 92 прекршоци, од кои 76 во Тетово и 16 во Гостивар. За сите прекршители изготвени се соодветни поднесоци и тие ќе се соочаат со парични глоби кои се движат од 20 до 50 евра во денарска противвредност.

Секторот за внатрешни работи Тетово повторно апелира до пешаците да ги преминуваат улиците на обележани премини, да ја почитуваат светлосната сигнализација на крстосниците и правилно да се движат таму каде што нема обликувани тротоари. Особено, на родителите на малолетни деца им се советува да водат сметка и да не ги пуштаат децата сами на улица, за да не се изложат на опасност да бидат удрени од некое возило.

На возачите им се укажува да ја намалат брзината пред прешачките премини и секогаш да им даваат предност, односно да ги пропуштат пешаците. Недавањето предност на пешаците, според Законот за безбедност на сообраќајот на патиштата се санкционира со изготвување на поднесок и со глоба во износ од 200, односно 250 евра во денарска противвредност.