Од 7 до 23 илјади евра кредити од проектот за самовработување на млади

Агенцијата за вработување на Република Македонија го објави јавниот оглас од Проектот за самовработување со кредитирање наменет за млади невработени лица кои сакаат да започнат сопствен бизнис. Право на учество имаат сите евидентирани невработени млади лица до 29 години, без оглед на времетраењето на невработеноста.

Со овој проект може да се добијат 7.000 евра, а за секое новоотворено работно место дополнителни 1.000 евра, при што максималната сума може да достигне до 23.000 евра. Рок на враќање на средствата е седум години, односно период на отплата 66 месеци и  грејс период од 18 месеци. Каматната стапка е од 1% на годишно ниво, а неопходно е сопствено учество од корисникот на кредитот од најмалку 25% од износот на  бараниот кредит (во вид на опрема, предмети или пари).

Заинтересираните невработени лица барање за кредит можат да поднесат во работните клубови на Центрите за вработување, кадешто можат да добијат и детални информации за проектот.