Од почетокот на пандемијата во регион на Гостивар има скоро 4.000 потврдени корона случаи

По двомесечната стабилизација на состојбата со коронавирусот, регионот на Гостивар последните десетина дена се соочува со зголемени бројки на нови случаи. Според статистиката на Институтот за јавно здравје, моментално подрачјето има 227 активно заразени пациенти.

Од почетокот на пандемијата во регионот на Гостивар со коронавирус биле дијагностицирани вкупно 3.969 лица. Со смртни последици завршиле 173 случаи, додека 3.569 се евидентирани како оздравени. Најкритичен период за Гостивар во пандемијата беше крајот на ноември и декември месец, минатата година, кога освен на инфективно, пациенти се хоспитализираа и на интерно и неврологија во болницата.

Заклучно со вчера, во Македонија има вкупно 9845 активно болни со корона. Најпогодени региони се Скопје, Прилеп, Кавадарци, Охрид, Неготино.

Според категоризацијата на ризикот и проценката на ситуацијата земајќи ги во предвид индикаторите на СЗО за можноста за понатамошна трансмисија и капацитетите за одговор на земјата се проценува дека се наоѓаме во фаза 4 (широко-распространета трансмисија во заедницата), подниво 3, со умерени капацитети за одговор.