Од утре етапна исплата на пензиите на шалтер, пензионерите да не се туркаат и да носат заштитна опрема

Од утре (27 април) ќе започне исплатата на пензиите на шалтерите на банките. Министерството за труд и социјална политика апелираше до пензионерите да се придржуваат до распоредот за исплата на пензиите, да ги почитуваат препораките за носење лична заштитна опрема на лицето и држење растојание од најмалку два метра додека чекаат во ред пред или внатре во банките.   

Исплатата на пензиите на шалтерите ќе се врши етапно, според висината на пензијата и тоа:

– за пензии до 11.000 денари, исплата во понеделник 27-ми април;

– за пензии од 11.001-14.000 денари, исплата во вторник 28-ми април;

– за пензии од 14.001-18.000 денари, исплата во среда 29-ти април

– за пензии повисоки од 18.001 денар, исплата во четврток, 30-ти април.

Етапната исплата на пензиите е направена со цел да се избегне метежот пред банките и да се овозможи поголема заштита на пензионерите во услови на опасност од коронавирусот КОВИД-19, нагласуваат од Министерството.

Пензионерите кои користат платежна  картичка поврзана со сметката на која се префрлува пензијата, веќе можат да ги користат парите за безготовински плаќања во продажната мрежа или преку електронско и мобилно банкарство. Исто така, пензиите можат да ги подигнат на банкоматите на банките.