Општина Гостивар и интернатот со новогодишна забава ги израдуваа дечињата со посебни потреби

Во средношколскиот интернат во Гостивар денес  се организираше предновогодишна забава и ручек за децата со посебни потреби и нивните родители. Во празнична атмосфера, дечињата ги забавуваа маскоти од цртаните филмови и омилениот лик за Новата година, Дедо Мраз. Дружењето го организираа општината и управата на интернатот.

„Преку целата година имаме активности за поддршка на децата со посебни потреби и речиси да нема празник кога не сме со нив. Така сега, се собравме на заеднички ручек по повод новата година, а избравме да бидеме овде, во интернатот, затоа што годинава објектот се реновираше, па има добри услови и убава атмосфера.“, изјави градоначалникот Арбен Таравари.

Директорката на интернатот, Линдихана Салаи Сулејмани рече дека со големо задоволство ја заокружуваат 2019-та година на овој начин, со хуманитарен настан за децата. „Ова нека биде и една порака да им пружаме секогаш повеќе внимание и љубов на дечињата со посебни потреби“, рече Сулејмани. 

Градоначалникот Таравари на дечињата коишто денес беа на заедничкиот предновогодишен ручек и дружба им подари пакетчиња. Децата возвратија со прегратки и честитки со искрени желби за новата година.