Општина Гостивар и во 2020-та ќе дава субвенции за инвертери, буџетот за животна средина е 3,6 милиони денари

За заштита на животната средина, наредната година во општинскиот буџет на Гостивар предвидени се средства во висина од 3,6 милиони денари. Оваа сума е двојно повисока во однос на овогодинешната. При образложувањето на буџетот на последната седница на Советот, градоначалникот Арбен Таравари истакна дека општината и во 2020-та година ќе доделува субвенции на граѓаните за инвертери и увидела потреба да ги зголеми средствата за таа намена.
„Субвенционирањето за инвертери се прави со цел да ги стимулираме граѓаните да користат енергетски ефикасни уреди за затоплување. Оваа година за прв пат ги воведовме субвенциите и за нив беа издвоени над 1 милион денари. Со оваа мерка ќе продолжиме и во 2020-та, за која година буџетот за заштита на животната средина е значително поголем. Освен за субвенции, средства од овој буџет ќе се искористат и за велосипеди“, рече градоначалникот.
На јавниот оглас за субвенции годинава имаше огромен интерес, а аплицираа граѓани кои купиле инвертер клима уред во периодот од март до октомври месец. На оние кои ги исполнуваат условите, општината им надоместува дел од трошоците направени при набавка на уредот во висина од 50%, но не повеќе од 15.000,00 денари со вклучен персонален данок на доход по домаќинство.