Пајак службата во Гостивар ќе оди под јавно-приватно партнерство

Јавното претпријатие за паркинзи и зеленило во Гостивар ќе бара приватна фирма партнер за разработување на пајак-службата со која се подигнуваат и транспортираат погрешно паркирани возила. Оваа новина е предвидена во Програмата за работа на претпријатието за 2024-та година, што беше изгласана на денешната седница на општинскиот Совет.

Како што појаснија од претпријатието, ваков чекор се презема од финансиски причини.

• Пајак службата ќе ја понудиме на приватен оператор, бидејќи возилото не е во добра состојба, а нашето претпријатие не располага со доволно финансиски средства да купува ново. Сметаме дека ќе биде поефикасно оваа дејност да биде по модел јавно-приватно партнерство. Навистина е потребно да функционира пајак служба континуирано, а особено за време на сезона кога се гужвите во сообраќајот., кажа Кујтим Незири од ЈП „Паркинзи и зеленило“, додавајќи дека зависно од договорот со приватниот оператор, дел од средствата собрани од услугите би се слеале на сметка на претпријатието, а дел на компанијата.

На советничко прашање во врска со неисплатени плати на вработените во претпријатието, Незири одговори дека од стапување на должност на новиот директор платите се редовни, а има тенденција во блиска иднина да се подмират и долговите кон вработените од претходно заостанатите плати.