Советот на Гостивар усвои Програма за проблемот со кучињата скитници

На денешната седница на Советот на општина Гостивар беше усвоена Програма за решавање на проблемот со бездомните животни за 2024-та година. Документот содржи образложение на состојбите и потребите, проценки на број на кучиња скитници, начини на третман, едукативни активности за населението и др.

„Одделението за комунални дејности има обврска да ја изготви Програмата, таа е истата како и лани. Агенцијата за храна и ветеринарство ја разгледа и прифати. Сепак, проблемот со кучињата скитници општините не можат сами да го решат, дека тоа е национален проблем беше кажано претходно и од централната власт. Треба решение на регионално ниво, слично како со регионалните депонии. Знаеме дека кучињата се транспортираат од една во друга општина и локалните самоуправи не можат сами да се справат со тоа. Ако Владата не преземе обврска да го реши пробемот на регионално ниво, тогаш останува општините сами да се снаоѓаат.“, рече раководителот на Секторот за заштита на животната средина, Зуди Џелили, во чиј склоп е одделението за комунални дејности.

Инаку, Програмата опфаќа заловување и масовна стерилизација/кастрација и вакцинација на бездомните животни, по што истите се враќаат на територијата од којашто биле заловени и каде што продолжуваат да живеат. „Поради порастот на популацијата, за најбрз загарантиран ефект препорачливо е 70% од кучињата во одредено географско подрачје да се стерилизираат/кастрираат во рок од 6 месеци.  Со 75% стерилизирани /кастрирани единки, процентот на напредок на популацијата станува 0%, по што бројот на кучиња природно почнува да опаѓа.“, пишува во документот.

Наведени се и едукативни кампањи за одговорен однос кон животните, кои се однесуваат на:воведување концепт на одговорно сопствеништво, важноста од стерилизација, вакцинација, идентификација и регистрација, поттикнување на сопствениците да ги стерилизираат, вакцинираат, и да ги регистрираат своите миленици, промовирање на одговорна грижа за „маалските“ бездомни кучиња итн.

Проценка на изготвувачите на Програмата е дека на подрачје на Општина Гостивар има околу 1000 бездомни кучиња, од кои 650 во градот и останатите 350 по селата.