Парични награди за ученици кои освоиле прво место на државен ученички натпревар

Ученици од основно образование и нивни ментори  кои освоиле прво место на државен ученички натпревар, организиран од акредитирано здружение на наставници, може да се пријават за исплата на парични награди.

Барањата од ученикот односно од неговиот наставник за исплата на парична награда за освоено прво место на  натпревар на државно ниво во учебна година, според Законот за основното образование, се доставуваат до Министерството за образование и наука најдоцна до 31 декември во тековната година кога е организиран натпреварот.

Ученикот, заедно со  наставникот кој го подготвувал за натпреварот, треба да достави пријава и други документи кои се наведени во објавата на МОН, каде што покрај пријавата достапни за преземање се и обрасците за изјави од ученикот од наставникот.

Министерството за образование и наука, исто така, објави и повик за покривање трошоци за котизација и пат за учество на еден меѓународен натпревар во текот на 2022 година од областа на математиката, информатиката и природните науки.

На јавниот повик може да поднесат барање акредитирани здруженија на наставници за организирање на натпреварите на учениците од основните училишта од страна на Министерството за образование и наука.

-Под меѓународен натпревар се подразбира натпревар на кој учествуваат ученици од најмалку десет различни држави, на кој се споредуваат знаењата помеѓу учениците од различните држави и се врши рангирање на најдобрите ученици од сите земји кои учествуваат на меѓународниот натпревар, информира МОН.

Министерството за 2022 година ќе ги покрие трошоците за учество (котизација и пат) на еден меѓународен натпревар од областа на математиката, информатиката и природните наука, за најмногу шест ученици и најмногу три ментори, чиј број зависи од правилата на организаторите на меѓународниот натпревар.

Во објавениот повик се наведени документите потребни за аплицирање и начинот и рокот на пријавување.