Почина легендата на хрватскиот фудбал Златко „Цицо“ Крањчар

Легендарниот фудбалер и тренер, поранешен селектор на хрватската фудбалска репрезентација Златко Крањчар почина денеска во Загреб на 65-годишна возраст.

Тој бил примен во болницата во Задар на 18 февруари поради проблеми со црниот дроб. По десетдневно лекување, поради влошената состојба бил пренесен во Загреб, каде ја губи битката, пренесува 24sata.hr.

Крањчар е роден во Загреб на 15 ноември 1956 година. Уште од рана возраст беше поврзан со Динамо, каде го помина поголемиот дел од кариерата освојувајќи ја шампионската титула 1982 година и два Купа. Играчката кариера ја заврши во Санкт Полтен во 1991 година. 

Легендарниот Цицо беше капитен и на хрватската фудбалска репрезентација на историскиот прв натпревар помеѓу Хрватска и САД (2-1) одигран на 17 октомври 1990 година. Златко Крањчар беше исто така една од најголемите „сини деветки“ во историјата на Динамо и голем миленик на сите навивачи на клубот од Максимир.