Почна вакцинирањето против ковид во земјава

Со вакцинирање на здравствени работници, денес во Македонија отпочна процесот на имунизација против ковид 19.

„Вакцините се безбедни без разлика од кој производител доаѓаат и ова е единствен начин да се справиме со пандемијата, не само ние, туку сите земји.Посакувам успешна имунизација, направивме таква организација да кога ќе почне вакцинацијата да не запре и верувам дека ќе имаме успешен процес.“, рече министерот за здравство, Венко Филипче кој присуствуваше на аплицирањето на првите вакцини.

Во текот на денешниот ден, според најавите планирано е да се вакцинираат 260 здравствени работници. Вакцинацијата се одвива со вакцини од Фајзер, кои земјава ги доби како донација од Србија.

Вакцинирањето на првите две медицински лица се емитуваше во живо на фан страните на фејсбук на министерот и Министерството. На видеото можеше да се забележи дека сестрите кои ја аплицираа вакцината против Covid-19 носат заштитни маски, но не носеа заштитни ракавици.