Поезијата станува мост на зближување меѓу младите во Гостивар

Десетина млади гостиварци беа дел од второто поетско читање „Проекции под исто небо“ кое го организира Клубот на млади поети во Гостивар, а се одржа вчеравечер. Интересот за пишаниот збор меѓу помладата генерација расте, што може да се забележи токму на настаните од ваков тип. Учесниците пред публиката се претставија со свои стихови, а во парови читаа и поезија од познати автори.

Освен што развиваат љубов и афинитет кон поезијата, младите од различни националности преку оваа активност се зближуваат, соработуваат и негуваат  мултикултура. Специјален гостин на поетското читање беше поетот Сефер Селими, кој воедно е идеен основач на Младинскиот совет на Гостивар.

„Чест ми е што ме поканија да бидам гостин на поетското читање и со задоволство прифатив. Треба да ги поттикнеме и поддржиме младите поети да продолжат да ја негуваат културата и социјалниот живот во Гостивар преку пишаниот збор. Самото име „Проекции под исто небо“ многу илустративно покажува дека ние ги делиме истите предизвици и проблеми и заеднички треба да се справуваме со нив“, изјави Селими.

Освен читање на стихови, програмата на настанот беше збогатена и со музика.