Помина еден месец – Кога ќе се отвори градскиот пазар во Гостивар?

Гостиварци немале пазарен вторничен ден веќе еден месец. Големиот градски пазар во Гостивар кон крајот на март беше затворен, како превентивна мерка за заштита од ширење на коронавирус. Затворањето беше заедничка одлука на општината и претпријатието кое стопанисува со пазарот и се однесуваше на период од 30 дена.

Според најавите кои доаѓаат од локалната самоуправа, можно е градскиот пазар да проработи наредната недела.

„Оваа недела се уште нема да работи пазарот, но следната недела можно е да биде отворен. Очекувам Владата да ги олабави рестриктивните мерки. Веќе имаме препорака од генераниот секретар на Светската здравствена организација секоја држава постепено, во склоп на своите околности да почне да ги редуцира ограничувањата и се надевам дека тоа ќе се случи и кај нас“, одговори градоначаникот Арбен Таравари на новинарско прашање за повторното отворање на градскиот пазар.

Сепак, од кога точно ќе проработи пазарот ќе биде потврдено во наредните денови.

Според новите мерки што ги најави министерот за здравство Венко Филипче, покривањето на носот и устата со маска, шал или марама ќе биде задолжително за затворен простор (маркети, аптеки, чекалници, банки и сл), но и за пазарите каде нема услови за држење дистанца од 2 метри.