Поради доаѓањето на печалбарите паркиралиштата во училиштата во Гостивар отворени за бесплатен паркинг

Во Гостивар во текот на летната сезона, кога сограѓаните иселеници престојуваат во родниот крај, значително се зголемува сообраќајната фрекфенција, особено во централниот дел на градот. За да се намалат гужвите и нервозите кај возачите, се обезбедуваат дополнителни места за паркинг на паркиралиштата во основните и средни училишта.

„Продолжуваме со праксата како и изминатите години и ги ставаме во функција паркинзите во основните и средните училишта, каде паркирањето ќе биде бесплатно. Ова се прави со цел да обезбедиме на нашите сограѓани подобри услови за време на нивниот престој во родниот крај.“, вели директорот на ЈП за паркинзи и зеленило, Беким Челебиу.

За зонското паркирање и затворените паркиралишта се наплатуваат соодветни билети за едно користење паркинг, неделни, двонеделни и месечни. Најавено е дека за поголем ред во сообраќајот во Гостивар, во летната сезона ќе се интензивира работата на пајак службата.