Поставување на бунгалови на патеката до Голем Кораб во НП Маврово

Во завршна фаза се градежните активности за поставување на три мали куќички, бунгалови во еден од најпосетените и најатрактивните делови од Националниот парк Маврово, Корабскиот масив и врвот Голем Кораб каде што поминува и дел од High Scardus Trail, информираа од НП.

Бунгаловите се поставуваат на почетната точка на патеката која води до врвот Голем Кораб, а активноста е во рамките на проектот Алтернативни сместувачки форми на Кораб финансиран од Германското друштво за интернационална соработка ГИЗ – Скопје. Куќичките ќе бидат наменети за сместување на посетителите на овој регион со што се решава и проблемот од недостаток на алтернативни сместувачки капацитети во дел од НП Маврово.

Периодов исто така, има активности за туристичка валоризација на пештерата „Шаркова Дупка“ во Маврово и обука на двајца кандидати за спелеолози-водичи што ќе овозможи нејзино ставање во функција. Активностите се реализираат во рамките на проектот “Спелео авантурите- голема шанса за авантуристичкиот туризам” кој е финансиран од страна на НВО Паркови Динариди- Мрежа на заштитени подрачја ДИНАРИДИ.

Следната фаза од проектот предвидува санација на влезот – скалите во пештерата и осветлувањето со што наскоро се очекува пештерата да биде достапна и безбедна за посетителите.