Повик до лицата со попречености од Гостивар да ја искористат можноста за свој личен асистент

Центарот за социјална работа во Гостивар ги повика лицата со попречености да се пријават за да добијат личен асистент кој ќе им помага во секојдневните обврски. Ова им се овозможува преку Програмата за персонална асистенција, што се спроведува во седум градови во Македонија, меѓу кои и Гостивар.

Социјалните служни потенцираат дека е важно лицата со попречености да знаат дека нема да ги изгубат правата на надоместоци кои ги примаат, доколку се пријават за програмата за лична асистенција. „Може да се пријавуваат лица од 18 до 64 години со тешка или најтешка телесна попреченост или слепи лица. Со барањето се поднесува лична карта како наод и мислење од Комисија за попреченоста во физичкиот развој или видот“, објасни Сами Алија од Центар за социјална работа во Гостивар.

За лични асистенти на лицата со попречености веќе се пријавиле петнаесетина заинтересиани, чија обука ќе се спроведува преку гостиварскиот Црвени Крст. За својот ангажман, асистентите ќе бидат платени со месечен надоместок зависно од бројот на часови кои ќе ги одработат, при што цената за еден час изнесува 200 денари.

Програмата за персонална асистенција беше усвоена во март годинава и има за цел да се обезбеди поддршка за независно и самостојно живеење на лицата со потешка и најтешка телесна попреченост и лица со целосно оштетен вид. Освен во Гостивар оваа година програмата ќе се спроведе и во Битола, Струга, Куманово, Неготино, Струмица и Градот Скопје.