Повозрасните гостиварци немаат интерес за актиковид вакцина

Мал е бројот на граѓани над 70 години од гостиварскиот регион кои пројавиле интерес и се пријавиле за вакцинација против ковид. Од вкупно 6.000 евидентирани во системот Мој термин, пријавени се само 1.500. При денешната посета на Гостивар, министерот за здравство Венко Филипче упати апел матичните лекари да ја пријавуваат за имунизаицја оваа категорија пациенти, кои по приоритет за вакцина се после медицинскиот персонал.

„Од Гостивар преку сајтот vakcinacija.mk и преку матичните лекари се пријавени навистина малку граѓани во онаа прва категорија над 70 години. Прво апелирам матичните лекари од Гостивар и од регионот да ги пријавуваат граѓаните над 70 години со хронични болести за првата следна приоритетна група и да ги внесуваат податоците  во системот Мој термин, зашто тие ќе бидат вакцинирани веднаш после лекарите и медицинските сестри од Гостивар.“, рече министерот.

Првата група од 40 здравствени работиници од Гостивар примија вакцина против ковид во четвртокот.

„Се работи за здравствени работници кои директно се тангирани со ковид пациенти, значи лекари и сестри од инфективното одделение, лаборанти и рентген технолози. Сега ги чекаме натамошните насоки од Министерството за здравство, како ќе бидеме ставени во календарот за вакцинација“, рече  Јакуп Јакупи, директор на болницата во Гостивар

Министерството за здравство ќе прави кампања со која цели да го зголеми интересот за антикорона вакцинација.