Православен празник Младенци, во чест на љубовта, младоста, бракот

Според календарот на МПЦ (Јулијанскиот календар) денеска е еден од поголемите христијански празници од пролетниот циклус каде се слават Четириесете Севастиски маченици – Младенци.

Празникот Младенци е целосно посветен на младите, на младоста и љубовта, и со него се поврзани многу желби за среќен брак и убава иднина. Обичај е на овој ден да се оди на гости и да се носат подароци кај младите што стапиле во брак меѓу двата празника. Инаку, се верува дека какво е времето денес, такво ќе биде цела пролет. Именден слават Младен, Младенка, Млада…

Во минатото овој празник во Македонија го празнувале не само македонското христијанско население туку и муслиманското кое го именувало како „Султан Нефруз“. Очигледно е дека во минатото во Македонија со празникот „Свети четириесет маченици“ биле поврзани голем број обичаи и верувања. Еден дел од нив се поврзани со споменот за Светите 40 војници од Севастија, а другите со пролетната рамнодневица, со денот на пролетта и повторното оживување на природата.

Четириесете Севастиски маченици биле римски војници. За време на гонењето од страна на Ликиниј кој владел со источниот дел од Римското царство, заедно со Диоклецијан, тие биле изведени пред суд заради нивната вера, а потоа ставени во замрзнато езеро и оставени таму преку целата ноќ. Кога следното утро војсководецот ги нашол живи, ги погубил и нивните тела ги фрлил во водата за да останат непогребани. Но, три дена подоцна локалниот Севастиски епископ ги извадил моштите од водата и ги погребал.