Препорака: Управите на гостиварските училишта да ја зголемат контролата врз наставниците

Управите на училиштата во Гостивар да ја зголемат контролата над работата на наставниците, да се надгледуваат наставните часови, педагошките служби целосно да се растоварат од административните работи кои им припаѓаат на управите. Ова се дел од заклучоците донесени на денешниот состанок кој општинскиот Сектор за образование го одржа со педагошките служби на училиштата, на кој присуствуваа педагози, психолози и социолози од сите гостиварски основни и средни општински училишта.

“Ја остваруваме оваа средба со цел поефективно и поефикасно координирање на активностите и преку продлабочување на соработката, да го подигнеме квалитетот на образовниот процес и на оваа толку значајна област да му го вратиме  заслуженото место во општеството”, изјави Асилан Снопче, раководител на Секторот.

На состанокот било договорено ваквите средби да бидат редовни и да се одржуваат во првата недела од месецот, а педагошките служби редовно да известуваат за својата работа.

Исто така, договорено е еднаш месечно да се организираат работилници, предавања на одредени теми корисни за учениците.