Промовирано Здружение за поддршка на деца со аутизам во Гостивар

Семејствата од гостиварското подрачје коишто имаат деца со аутизам, отсега со заеднички сили ќе се справуваат со предизвиците и проблемите. Борбата за поголема поддршка и вклученост, ќе ја водат преку новоформираното Здружение на лица со аутизам наречено „Blue puzzle“. Целите, работата и плановите на Здружението беа промовирани на посебен настан што се одржа во општинската сала.

„Здружението е формирано од родители на деца со аутизам, со цел заедно да се бориме за подобар стандард и поголема институционална помош“, рече Валон Емини, претседател на Здружението.

На настанот се обрати и градоначалникот на Гостивар, Арбен Таравари.

„Како општина целосно ја даваме својата поддршка на родителите и децата. Работиме во насока на обезбедување на посебен Центар за децата со аутизам и посебни потеби, кој е планирано да биде отворен во поранешните простории на „Јахја Ќемал““, изјави градоначалникот.

Здружението ќе организира и работилници и обуки наменети за родителите. „Раното препознавање и дијагностицирање на аутизмот е многу важно за правилно да му се помогне на детето. Во таа насока, нагласуваме дека мора да се надминат предрасудите и срамот и сите сили да се насочат за доброто на дечињата“, рече Милена Велјаноска, дефектолог, соработник на Здружението.

Прецизна статистика за состојбата со аутизмот во Гостивар за сега не постои, но претпоставките се дека има околу 200 деца со аутистичен спектар на нарушувања.