Протест на танцовите центри – бараат дозвола да работат и надомест на штетата

Танцовите центри на протест побараа укинување на забраната за работа и финансиски надомест за претпрените штети во изминатата година.

„Танцот е пред колапс, а 6000 деца се спречени од вршење на нивната омилена активност – танцувањето.  46 приватни танцови клубови во земјата, од вчера се приклучија на протестите поради нелогичностите при постапувањето на Владата со новите рестриктивни мерки, а кое опфаќа затворање на овие институции и спречено вршење на нивната дејност засега до 27.04.2021, а со веројатност за продолжување. Иако последните изјави на Владата се однесуваа на финансиско компензирање на сите правни субјекти кои беа затворени во изминатиот период, како и лани, така и сега, танцовите клубови не фигурираат на списокот на субјекти кои ќе добијат надомест на штетата. Танцовите клубови реагираат и бараат одговорност од Владата бидејќи ваквата одлука е во најмала рака некоректна и нецелосно промислена. Уште повеќе, нивната иницијатива ја повикува Владата на одговорност и бара образложение за причините поради кои нивните центри се затвораат.“, нагласуваат центрите.

Танцовата заедница појаснува дека следејќи го примерот на колегите од европски земјите, сами создале протокол за работа кој бил одобрен по шест месеци од нивното затворање (март-септември).
„Во наредните седум месеци откако танцовите клубови повторно се отворија, од нив предложениот протокол се покажа целосно ефикасен. Всушност, во рамките на седум месеци работа, не се појави ниту еден случај на заболено дете, а уште помалку кластер и протоколот беше целосно испочитуван како од центрите, така и до членовите и нивните семејства, што вклучува навремено јавување при појава на случај на суспектен или заболен од КОВИД -19 во семејствата и изолирање на цели групи како претпазливост. Танцовите центри во целост ја променија формата на своето работење, со ограничувања на бројот на деца во сала, комплетни процедури за дезинфицирање и вентилирање на просториите, скратување на работното време на половина – најмногу четири часа во денот, вклучувње на паузи по секој час и обележување на просторот за движење и користење.“, реагираат центрите.