Протест на вработени во болницата во Гостивар: Бараме да бидеме почитувани како здравствени работници!

Вработени во општата болница „Д-р Ферид Мурад“ во Гостивар, членови на Независниот синдикат на здравствени работници, утрово излегоа на полчасовен протест. Порачаа дека треба да бидат почитувани во општетсвото и добро платени.

„Се собравме по повод Меѓународниот ден на здравјето. На сите граѓани им посакуваме добро здравје, нормално, добро здравје на граѓаните, помалку обврски за нас. Со овој протест сакаме да им порачаме на функционерите, на идната Влада, да знаат дека ние здравствените работници треба да бидеме почитувани. За да имаме квалитетно здравство, треба да имаме современи апаратура, квалитетни обуки и што е најважно, добро платени здравствени работници. Ние како здравствени работници бараме да бидеме почитувани во општеството.“, изјави Ивица Билбилоски, заменик претседател на Независниот синдикат на здравствени работници во гостиварската болница.

Како што информираше Билбилоски, нивниот синдикат во болницата во Гостивар брои 220 члена, додека на државно ниво имаат околу 2.000.

Медицинари денес протестираа и во Скопје, пред Министерството за здравство, во знак на незадоволство од непотпишаниот анекс на Колективниот договор.