Протест во Гостивар: Имаме право на чист воздух, да се преземат мерки против загадувањето веднаш!

Со пораки за чист воздух, барања за дислокација на индустриските загадувачи и формирање регистар на фирми кои загадуваат, денес во Гостивар се одржа протест против загадувањето на воздухот.

Настанот го организираше Здружението ГвЕко, од каде потенцираа дека централната и локалната власт мора да преземат мерки за да го сопрат аерозагадувањето.

„И локалната и централната власт се свесни дека загадување постои и крајно време е да ги преземат законските мерки против загадувачите. Ние бараме дислокација на големите индустриски загадувачи, на 15 километри надвор од градот, во спротивно нека се затворат. Тие го трујат воздухот. Исто така, она што е многу важно е да се направи регистар на загадувачи, точно да се знае какви супстанци се испуштаат во воздухот и како тоа влијае врз луѓето. Сметам дека Министерството за животна средина намерно не прави официјален регистар за да не се знаат ваквите податоци во јавноста.“, изјави претседателот на здружението Ахмет Салмани.

Екологистите нагласија дека сите истражувања докажуваат дека загадениот воздух е тивок убиец и е причина за болести на респираторниот систем, ризик фактор за појава на карцином и многу други.

Селмани побара од властите да покажат добра волја со што проблемот на загадувањето би можел да почне да се решава веднаш.