Првачиња, сипаници, уписи, вакцини!

Две недели по почетокот на упис на ученици во прво одделение, нема кој да пресече: да или не – за запишување на првачиња кои не примиле вакцина против МРП. Надлежните Министерства, до сега не можеа целосно да ги усогласат ставовите. Епидемија на морбили е прогласена на ниво на целата држава пред еден месец.

„Невакцинирањето на децата доведе до оваа ситуација. Нема да отстапиме да се примаат само вакцинирани деца“, изјави министерот за здравство Венко Филипче.

Законите одредуваат дека основното образование е задолжително и е право на сите деца, но законски е определена и заштитата од заразни болести.

„Една од опциите која се разгледува е да се запишат учениците, во меѓувреме да се вакцинираат или на почеток на септември да има теренска вакцинација за сите кои следат редовен образоване процес, а не се вакцинирани.“, изјави министерот за образование, Арбер Адеми.

Темата: првачиња, уписи, вакцини ќе се дискутира на седница на Владата.

Според последните податоци од Институтот за јавно здравје, во земјава има 1.393 случаи на мали сипаници. Според место на постојано живеење, 837 случаи се од Скопје, Куманово – 160, Тетово – 118, Струга – 81, Кичево – 39, Гостивар – 36, Велес -31, Гевгелија -19,  Дебар – 18, Охрид – 16, а во останатите градови се регистрираат по помалку од 10 случаи.