Од утре бензинските пумпи сами ќе ги формираат цените на горивата

Од утре новите цени на горивата граѓаните ќе ги дознаваат на бензиските станици. Бидејќи е истечен договорот со Хеленик петролеум според кој комисијата ги утврдуваше цените на нафтените деривати, а методологијата за формирање цени на Регулаторната комисија за енергетика важи до вечерва на полноќ.

Од РКЕ, се надеваат дека нема да дојде до ценовни шокови и апелираат цената на горивата да остане во рамки на движењето на светската берза. Во настанатава ситуација трговците со нафтени деривати имаат потполно право самите да си ги формираат продажните цени на нивните бензиски станици. Се додека не се донесе нова методологија и законските измени не стапат на сила.

Новата регулатива по која во иднина ќе треба да се одредуваат цените на нафтените деривати заглави во собраниските лавиринти и се уште не е донесена. Од Регулаторна најавуваат нова методологија на одредување на цените на горивата. Со која се предвидува во иднина основа да биде цената на суровата нафта на светските берзи, без пресметка за производство. На трговците ќе им се плаќаат и трошоците за складирање, транспорт, ќе бидат вкалкулирани и повисоки трошоци за обезбедување поголеми количини нафтени резерви. Но, се уште се преговара колкава ќе биде маржата. Уште најавено е и дека новите цени, ќе се утврдуваат на секои 7 дена, наместо досегашните 15 дена.