Први случаи на заразени со грип во Гостивар сезонава

Во гостиварскиот регион регистрирани се првите заразени пациенти со грип оваа сезона. Според податоците во извештајот на Институтот за јавно здравје, во периодот од 19 до 25 октомври пријавени се два случаи на грип од Гостивар.

Во истиот период, вкупно во земјава се евидентираат 30 заболени од кои најголемиот дел, односно 23 се од Дебар. Во однос на возрасната дистрибуција, најмногу, дури 14 лица се деца, од возрасната група од 0-4 години.

Во сезоната 2020/2021 вкупниот број на заболени од грип во Македонија изнесува 74, што е 17 повеќе во споредба со истиот период минатата година кога биле регистрирани 57 заболени лица, се наведува во извештајот на ИЈЗ.

На ниво на Европа се проценува дека активноста на вирусот на грип е на меѓусезонско ниво.

„Пандемијата (КОВИД-19) има негативно влијание врз здравствениот систем и капацитетите за тестирање на земјите во регионот што (намалено пријавување на епидемиолошки и вирусолошки податоци за грип). Затоа, презентираните податоци мора да се толкуваат со претпазливост.“, пишува во извештајот за грип.

Вакцинацијата против вирусот на грип во Македонија се уште не е започната.