Прво спакувајте си лекови, па тргнете на одмор

Планирањето и разгледувањето на понудите за летни одмори веќе е во полн ек. Иако, кога станува збор за долгоочекуваните десетина дена одмор, сакаме да мислиме само на убавите нешта, забавата, пливањето, прошетките, сепак на пат треба да тргнеме подготвени и за непријатните работи. Може да се случи: настинка, повреда, каснување од инсекти и слично, затоа е добро да се имаат неколку лекови при рака. Според лекарите има неколку работи без кои не би требало да тргнете на годишен одмор, особено доколку одите со деца. Аптеки има насекаде, но во странство лековите се поскапи, а и не можете сите да ги добиете туку така без рецепт. Дури и ако останувате во границите на државата, спакувајте ги неопходните препарати, за да може да реагирате брзо и во било кое време. Списокот отприлика би изгледал вака:

-лекови за намалување на температура, како парацетамол или бруфен

-препарати против дехидрирање при повраќање или проливи – електролити

-стерилни гази, медицински фластери и гел/раствор за обработка на рани

-лекови против алергии – антихистаминици

-маст/гел за ублажување јадеж од инсекти

-капки за нос – особено ако престојувате на планина

Се разбира доколку некој страда од хронична болест, тогаш со себе треба да си понесе доволна количина од редовната терапија за целиот одмор.