Расте бројот на напади и омаловажувања на полицајци во гостиварско

Во годината што измина Секторот за внатрешни работи Тетово регистрирал вкупно 13 напади на полициски службеници, од кои седум се случиле на гостиварското подрачје. Анализите покажуваат зголемување на ваквите случаи во споредба со претходната година. Нападите целосно биле расчистени и заокружени со 14 кривични пријави.

„Најголемиот број од нападите биле извршени поединечно, додека во неколку биле инволвирани по двајца напаѓачи. Нападите најчесто се случиле при воспоставување јавен ред и мир, регулирање и контрола на сообраќајот, реализирање на асистенции или при приведување и задржување на лица“, информира СВР.

Во два од минатогодишните напади, покрај физичка сила, напаѓачите употребиле орудија и други предмети .Сите напаѓачи биле полнолетни, додека нападите завршиле со една тешка и 18 лесни телесни повреди.

Во 2017-та во полошко пријавени се и 29 навредувања и омаловажувања на овластени службеници лица, претежно полициски службеници.