Регион Гостивар: 207 пациенти со корона се во домашна изолација, 20 се хоспитализирани

Бројката на новодијагностицирани со коронавирус на гостиварското подрачје е во постојан пораст. Според податоците кои ги изнесе Кризниот штаб моментално вкупно активно болни се 227 лица, од кои 179 се од Општина Гостивар, 43 од Општина Врапчиште и 5 од Маврово Ростуше.

Од заболените 207 се со благи симптоми или асимптоматски и се во домашни услови, додека 20 се хоспитализирани.

„Порастот на заболени се должи на тоа што не се почитуваат мерките за заштита кои се донесени од Владата и Министерството за здравство. Состојбата е сериозна, сите институции треба да настојуваме, да апелираме и да преземаме чекори да се почитуваат мерките, да се носат маски и да се одржува дистанца без разлика дали граѓаните се во банка, во кафетерија, секаде кадешто е задолжително“, беше речено на состанокот.

Како оздравени, со по два негативни контролни тестови се водат 136 граѓани, додека починати се 24 пациенти кај кои бил потврден вирусот од кои 17 од Општина Гостивар, 6 од Општина Врапчиште и 1 од Маврово Ростуше.

Од почетокот на пандемијата до сега, во регионот на Гостивар направени се 1.365 тестови за ковид.