Роботски вулканизер двапати побрз од човечки раце?

Американската компанија RoboTire започна со продажба и инсталирање на своите роботски решенија за брзо менување гуми на патничките автомобили, кои ја намалуваат потребата од луѓе и го забрзуваат целиот процес.

Во иднина може да го однесете вашето возило на вулканизер за промена на гумата, а таму би можел да ве послужи робот. Токму таква е визијата на американската компанија RoboTire која разви и почна да инсталира роботски асистенти во работилниците за вулканизација.

Роботските раце на оваа компанија се произведени во САД и користат технологии како што се вештачка интелигенција, компјутерска визија, машинско учење, сопствен софтвер и напредни камери со висока резолуција, сето тоа за да можат брзо и ефикасно да ги демонтираат и монтираат тркалата на автомобилот. За целата операција, со помош на еден техничар, овој робот може да смени четири гуми на патнички автомобил за околу 25 минути. Ова заштедува време, им го олеснува најтешкиот дел од работата на луѓето, а исто така го намалува ризикот од нивни повреди на работа.

Како што можеме да видиме на видеото, роботот е ангажиран во отстранувањето на тркалата од возилото и враќањето назад, со помош на пневматски шрафцигер. Балансирањето, проверката на притисокот, како и менувањето на гумата на бандажот сепак го прави човек, додека роботската рака е задолжена за сите манипулации на тркалото. RoboTire јавно не ја наведува цената на својот роботски асистент на вулканизерите, но вели дека инвестицијата во овој систем може да се исплати за повеќето работилници во рок од една година, како во однос на намалените трошоци за персонал, така и зголемената продуктивност.