Романтично запросување покрај Ростушкиот водопад Дуф

Романтичен гест на еден млад човек, деновиве го сврте вниманието на јавноста и предизвика низа позитивни реакции. Роби Симоноски ја побара за жена својата сакана Џумана Балиќ во воодушевувачката природа крај Ростушкиот водопад Дуф. Сето тоа беше изненадување за девојката, а зачинето со шампањско, балони и цвеќе, како што е редот кога се покажува љубов и внимание. Секако, го доби одговорот што го посакуваше – ДА. Нека се среќни и вечни!

Користиме прилика, па потсетуваме на убавините на водопадот Дуф кај Ростуше, природна реткост што вреди да се посети. Од центарот на селото до водопадот се стигнува за 30-тина минути. Патеката е обележана, уредена, обезбедена со дрвена ограда и во поголемиот дел е лесно проодна. До самите водопади се поминува низ Дуфскиот кањон кој е висок и до 60 метри и кој претставува вистинска атракција. Местото е специфично и со пријатната клима а температурата во најжешките летни периоди изнесува од 18 до 20 степени. Низ кањонот тече Ростушка река која е најголема во пролетниот период. Главна атракција и вистински празник за очите е водопадот Дуф со висина од околу 25 метри.