Се ограничува продажбата на масло во маркетите

Министерството за економија ги извести трговците на мало да ја ограничат продажбата на сончогледово масло на мала количина единечни пакувања, односно да не дозволуваат купување на цели пакети.

„Ваквото ограничување се должи на значајниот пораст на купување масло од сончоглед од страна на домашни купувачи во однос на редовната потрошувачка, како и странски купувачи со што се нарушува редовното снабдување на домашниот пазар. Со одлуката треба да се избегне непотребната појава на недостаток на сончогледово масло за јадење на полиците“, се вели во известувањето на Министерството.

Ограничувањето ќе трае до 31-ви мај. Дали и колку ќе се почитува, ќе контролира Пазарниот инспекторат.

Министерството ги замоли трговците, доколку купувач бара да купи поголеми количини масло за јадење да го известат инспекторатот.

Последниот период во повеќето маркети нема сончогледово масло на полиците.